إصنص إزعاج ..

لقد تم وسمي من قبل علوش
(مشكور)، لأتكلم عن أكثر الأشياء والأصوات التي تزعجني ..

أكيد في أكتر من هدول القصص، بس هدول أول شي خطروا براسي ..

1- كون ماشية بالطريق بأمان الله ، واسمع صوت جاية من ورايي (( أخخخخخ تفووووووووو)) وحس ببعض الرزاز يتطاير ويصطدم بوشي .. مابقدر أحكي عن شعوري بهيك حالات لأنو بكون خارج حدود الزمن والإحساس ..

2- واحد قاعد بوشي وعم يقشر جلدة شفايفوه بسنانوه .. تخيلتو الوضع؟

3- لما برد ع التليفون .. بيقلي الصوت الطالب .. ألو مرحبا عمو .. عطيني حدا أكبر منك أحكي معو !
أو مثلاً شي وحدة تشوفني وتقلي .. بأنو صف أنتي حبيبتي!

4- لما بكون واقفة شي ست ساعات عم انتظر تكسي أو أي شي تاني اركبوه ، وأخيراً يجي هالتكسي وتنفرج أساريري ، فيطلعلي واحد يتذاكى قال يعني .. مدري من وين يجي ويأشرلوا بكل برادة قلب ويركب بالتكسي ويطلع عليي بكل عيون بريئة وكأنو ماعمل شي!

5-بكره حدا يحكي على حدا قدامي .. مين ماكان هالحدا، عنجد كتير بضايق ومابعرف شو لازم أعمل غير أنو أسكت وهز براسي ..

6-لما قول لحدا إني عم أدرس إعلام ويبلشلك مواعظ بقى .. أنتي فتاة مسلمة وكنتي لاقيلك غير هالفرع .. شو بيلزمك .. ومشان شو .. وشو بعرفني، وكأني كفرت أو طلعت عن ديني ..

7-لما ولد صغير يبكي قدامي .. ببلش أبكي معو

8- هي حكوها قبلي بس عنجد بتزعجني ..أنو كون عم بحكي مع حدا ويكون شارد أو مو معي .. بكره حالي ومابعود أعرف شو بدي أحكي

9- صوت المنبه يالطيف شو بيضرب على عصبي .. يعني حتى لو كنت فايقة وسمعتو بحس حالي رح غوطن..

10- منظر الدم حتى لو كان ع التلفزيون .. يا أما بغوطن أو بغوطن

11- أخي لما يشغل موسيقاه المفضلة (( الهارد روك أو الميتال أو التكنو)) بصوت عالي .. وخصوصي خصوصي الصبح ..

بمرر الوسم ل رنوشة
و كرز